KE zbut masat: Kush është vaksinuar do të udhëtojë në të gjithë bllokun europian!

Komisioni Europian u propozoi vendeve anëtare të bllokut lehtësimin e kufizimeve aktuale të udhëtimeve jothelbësore për qytetarët e të ashtuquajturave vende të treta.
Rekomandimi vlen për qytetarët e vaksinuar kundër koronavirusit, por me kushtin që imunizimi i tyre të jetë kryer me vaksina të miratuara nga Agjencia Europiane e Barnave. EMA deri më tani ka aprovuar vaksinat e kompanive Pfizer/BioNTech, Moderna, Johnson & Johnson dhe AstraZeneca.

Vaksina ruse, Sputnik është duke pritur sakaq verifikimin nga EMA, dhe dritën e saj jeshile për përdorim edhe në BE. Në propozimin e Komisionit artikulohet qartë se të gjithë personat nga vende të treta, që janë të vaksinuar me njërën prej këtyre vaksinave, mund të udhëtojnë në Bashkimin Europian.

“Komisioni Europian propozon t’u lejojë hyrjen në BE, për udhëtime jothelbësore, jo vetëm personave që vijnë nga vende me situatë të mirë epidemiologjike, por edhe personave që kanë marrë dozën e fundit të rekomanduar të vaksinës, të miratuar nga BE-ja“, thuhet në dokumentin e krahut ekzekutiv të bllokut.

BE-ja i vendosi marsin e vitit të kaluar kur shpërtheu pandemia kufizimet për të gjitha udhëtimet jothelbësore. Me qëllimin të shmangej rreziku i importimit të varianteve të reja të koronavirusit, komisioni ka kërkuar gjithashtu edhe përdorimin e të ashtëquajturës “frenë e emergjencës”, e cila do të mundësonte vendosjen e kufizimeve të shpejta të udhëtimit për vendet ku situata shëndetësore pëson një përkeqësim të menjëhershëm.

Leave a Reply

Your email address will not be published. Required fields are marked *