Lulzim Basha ka një llogari me Fisin Paplekaj, si të Azem Hajdarit me Haklajt

Nga Kastriot Myftaraj

E ashtuquajtura Strukturë për Mbrojtjen e Votës në PD, ekzistencën e së cilës e pohoi Gazment Bardhi, kryejuristi i kësaj partie, nuk mund ta ishte krijuar pa urdhërin dhe miratimin e kryetarit të kësaj partie Lulzim Basha. Në anën tjetër, Basha i cili është gjithashtu jurist dhe ka qenë Ministër i Punëve të Brendshme, nuk mund të mos e kuptonte se një strukturë e tillë, që do të përballej me grupet kriminale, kishte shumë mundësi që të përfshihej në incidente të armatosura. Veçanërisht në zona si Elbasani.

Gjithashtu, Basha nuk mund të mos e dinte se meqënëse kriminelët-mbështetës të PS-së në Elbasan ishin shumë më të armatosur se njerëzit e PD-së, të cilët doli se kishin vetëm një revole, atëherë kishte shumë mundësi që një përplasje e mundshme mes dy palëve të përfundonte me disa të vrarë nga njerëzit e PD-së. Pikërisht këtë gjë donte Basha. Ai kishte nevojë për disa njerëz të PD-së të vrarë që t’ ia ngarkonte mbi shpinë arkivolet e tyre Kryeministrit Rama, dhe të barazohej me Ramën në kuptimin që të dy kemi arkivole mbi shpinë, unë të 21 janarit, ti të 21 prillit.

Por planin e Bashës e prishi Arbër Paplekaj me aftësinë e tij si qitës. Basha e kishte dashur Paplekajn të vrarë në 21 prill në Elbasan, bashkë me njerëzit e tjerë të Strukturës për Mbrojtjen e Votës të PD-së në atë qytet. Nëse do të kishte ndodhur kështu, askush nuk do të merrej me atë se çfarë ishte kjo Strukturë e Mbrojtjes së Votës, për të cilën u fol pasi pjestari i saj, Paplekaj vrau një njeri. Nëse anëtarët e Strukturës vriteshin, PD do t’ i quante vëzhgues të ngjarjeve.

Nëse Paplekaj vritej Basha do të mbante një fjalim të bukur në varrimin e tij, të shkruar nga Fitim Zekthi në bashkëpunim me Flutura Açkën. Por tani që ndodhi kështu, Basha ka detyrim që të shpjegojë, në mos jo publikisht, së paku privatisht, para njerëzve të Fisit Paplekaj, se çfarë garancish iu dhanë Arbërit dhe njerëzve të Strukturës së Mbrojtjes së Votës. A iu dhanë të njëjtat garanci si tropojanit tjetër katolik, oficerit të SHIK në Vlorë, Lekë Qokaj në shkurt 1997, të cilit Bashkim Gazidede, kryetari i SHIK-ut i kishte kërkuar që të mos e lëshonte ndërtesën e SHIK dhe në rast rreziku për çerek ore do t; u vinte ndihma me helikopter. Gazidede i ishte betuar për këtë gjë. Por katoliku Lekë Qokaj nuk e dinte se Gazidede betohej mbi Kuran dhe Allahu i çliron muslimanët nga detyrimi ndaj të pafeve, kur janë të shtrënguar t’ u bëjnë atyre premtime me be. Nëse Basha apo njeriu i ngarkuar prej tij për organizimin e Strukturës për Mbrojtjen e Votës Agron Kuliçaj i janë betuar Paplekajt se do të kishin mbështetje politike cfarëdo që të ndodhte, këtë e di Paplekaj. Por e sigurt është që Basha dhe Kuliçaj betohen mbi Kuran, kur ndodh që të betohen.

Paplekaj i krijoi familjes dhe fisit të tij armiqësi me disa familje mafioze në Elbasan. Ky është një problem shtesë përveç burgimit të tij. Në traditën shqiptare, i dënuari me burgim të përjtshëm quhet i vdekur i pakallur.

Lulzim Basha dhe Gazment Bardhi tani mendojnë se ata nuk kanë të bëjnë më me problemin që i shkaktuan Paplekajt, për vete, familjen dhe fisin. Azem Hajdari në të njëjtën mënyrë mendonte se ai nuk do të kishte pasoja nga vrasjet që po nxiste në Tropojë për ta patur nën kontroll krahinën e vendlindjes. Por nuk mendonte kështu Fatmir Haklaj pasi me porosi të Azemit i vranë vëllain. Azemi u mundua që t’ i gënjente Haklajt duke e adresuar vrasjen te dikush tjetër.

Për atë që e njeh sadopak Kanunin është e qartë se vrasësi, Fatmir Haklaj ka vepruar duke i ndjekur me përpikmëri absolute rregullat kanunore. Megjithëse e gjithë ngjarja u zhvillua jo më larg se 30 m larg murit të selisë së Partisë Demokratike, poshtë dritares së zyrës së kryetarit të asaj kohe të PD-së Sali Berishës, as Fatmir Haklaj, as njerëzit e tij nuk ngritën armët të lëshojnë ndonjë batare plumbash ndaj dritareve të selisë së PD-së. Fatmir Haklaj e dinte se kjo ngjarje do të hynte në histori, prandaj ai u kujdes që të sillej me përpikmëri kanunore absolute.
SPAK ka detyrim që ta hetojë ngjarjen e Elbasanit në thellësi, ndryshe do të ndodhë akti i dytë i tragjedisë të ndodhë në Tiranë duke marrë kokën e së paku dy politikanëve të lartë. Tekefundit edhe për Azem Hajdarin do të kishte qenë më mirë që të bënte disa vite burg për nxitjen e vrasjes së vëllait të Fatmir Haklajt se të vritej ashtu si u vra.

Një arsye më tepër për të cilën duhet të dorëhiqet Lulzim Basha është se ai, ashtu si Azem Hajdari ka sjellë në oborrin e tij histori vrasjesh për të cilat ka llogari të hapur gjaku.

Leave a Reply

Your email address will not be published. Required fields are marked *